Taekvondoçularımız Rusiyadakı beynəlxalq yarışda 4 medala yiyələnib

Rusiyada keçirilən Beynəlxalq Universitet İdman Festivalında taekvondoçularımız uğurla çıxış edirlər.

İdmançılarımızdan 54 kq çəki dərəcəsində yarışan Səyyad Dadaşov finalda rusiyalı Mikail Tomilova qalib gələrək fəxri kürsünün ən yüksək pilləsinə qalxıb.

Daha bir təmsilçimiz 68 kq-da mübarizə aparan Vaqif Hacıyev də həlledici görüşə vəsiqə qazansa da, burada uduzaraq gümüş mükafatla kifayətlənib. 80 kq-da yer alan Eltac Qafarov da turniri gümüş medalla tamamlayıb.

63 kq-da yarışan Pərviz İskəndərov da ölkəmizin aktivinə mükafat yazdırıb. O, yarışda bürünc medalın sahibi olub. Beləliklə, taekvondoçularımız mübarizənin ilk günündə ümumən 4 medala yiyələniblər.

Qeyd edək ki, Yekaterinburq şəhərinin 300 illik yubileyinə həsr edilən Beynəlxalq Universitet İdman Festivalında 36 ölkədən olan tələbələr 14 növdə qüvvələrini sınayırlar. Ölkəmizin 54-ü kişi və 15-i qadın olmaqla 69 idmançı ilə təmsil olunduğu yarışa avqustun 31-i yekun vurulacaq.