160 ölkə bu təşəbbüsə qoşuldu | COP29-un baş danışıqçısından vacib məlumat

“Biz iqlim dəyişikliyi sayəsində dayanıqlılığı təmin etməklə metan qazının yayılmasının qarşısının alınması istiqamətində bütün imkanlardan istifadə etməyə çalışırıq”.

Bu sözləri COP29-un baş danışıqçısı Yalçın Rəfiyev deyib.

O bildirib ki, bundan öncə keçirilən iqlim sammitində sözügedən istiqamətdə müəyyən nəticələr əldə olunub:

“Hazırda Azərbaycan da daxil olmaqla 160 ölkə bu zərərli qazın yayılmasının qarşısının alınması təşəbbüsünə qoşulub. Bu öhdəliyin icrası üçün biz metan tullantılarının yayılmasına rəvac verən bütün mənbələri diqqətlə nəzərdən keçirməliyik”.

O vurğulayıb ki, SOCAR da daxil olmaqla 50 şirkət neft və qazın dekarbonizasiyası üzrə təşəbbüsə qoşulub:

“Bu günə olan məlumata görə, 30-dan çox ölkə artıq “Metan qazı tullantılarının məhdudlaşdırılması haqqında” Bəyannaməyə qoşulduğunu elan edib. Onların arasında bu növ tullantıların atılması həcminə görə ilk 10 ölkə sırasında yer alan dövlətlər var. Qeyd olunan sənəd cari ildə bu sahədə görülə biləcək daha geniş spektrli tədbirləri müəyyən edir”.