Azərbaycanda qeyri-neft ixracı üzrə statistika açıqlanıb

2025-ci ilin yanvar-iyul aylarında ixrac edilmiş qeyri-neft sektoruna aid malların siyahısında qızıl birinci olub.

İqtisadi İslahatların Təhlili və Kommunikasiya Mərkəzinin məlumatına görə, bu dövrdə qızıl ixracının dəyəri 178,8 milyon ABŞ dolları təşkil edib.

Siyahıda 2-ci olan pomidor ixracının dəyəri 156,9 milyon dollar, 3-cü yerdə qərarlaşan pambıq lifinin ixracı isə 108,1 milyon dollar olub.

Ümumilikdə isə yanvar-iyul aylarında Azərbaycanın qeyri-neft sektoru üzrə ixracı 2 milyard 90 milyon dollar təşkil edib. Bu göstərici 2024-cü ilin müvafiq dövrü ilə müqayisədə 11,4 faiz çoxdur.

Yanvar-iyul aylarında qeyri-neft ixracında ilk yerdə Rusiya olub. Hesabat dövründə bu ölkəyə 716,6 milyon dollar dəyərində ixrac həyata keçirilib.

Sonrakı yerlərdə 339,7 milyon ABŞ dolları ilə Türkiyə, 186,6 milyon dollarla İsveçrə, 183,4 milyon dollarla Gürcüstan, 109,9 milyon dollarla Ukrayna qərarlaşıb.