Mərkəzi Bankdan manatın dəyəri ilə bağlı mühüm açıqlama

Son dövrlər rus rublu və türk lirəsinin ucuzlaşması manatın məzənnəsi ilə bağlı narahatlığı artırıb.

Artıq sosial şəbəkələrdə milli valyutanın da dəyərini itirəcəyi ilə bağlı iddialar yayılır. Həmçinin avqustda keçirilən hərraclarda iyul ayına nisbətən xarici valyutaya tələbatın artdığı müşahidə olunur.

Bu halda sual yaranır, manat da ucuzlaşa bilər?

İqtisadçı Xalid Kərimli enerji qiymətlərinin yüksək olduğunu və tədiyyə balansında 6 milyard dollar profisitin yarandığını vurğulayaraq bunun manatın məzənnəsinin sabit saxlamağa imkan verdiyini qeyd edib. Bildirib ki, manatın ucuzlaşması ikirəqəmli olan inflyasiyanı daha da artıra bilər. Ekspert həmçinin qeyd edib ki, hazırda manatın devalvasiyası hökumətin və Mərkəzi Bankın planlarına daxil deyil.

Mərkəzi Bank da manat üçün təhlükə görmür. Qurumdan bildirilib ki, Türkiyə və Rusiya Azərbaycanın əsas ticarət tərəfdaşları olsa da, bu ölkələrin milli valyutalarında müşahidə olunan yüksək dəyişkənlik daxili valyuta bazarına və manata mənfi təsir etmir. Vurğulanıb ki, valyuta bazarında vəziyyət əsasən cari əməliyyatlar balansından təsirlənir. Cari əməliyyatlar balansı isə son 3 ildə ardıcıl profisitli olub və ilin sonuna qədər bunun dəyişməyəcəyi gözlənilir.

Qeyd edilib ki, valyuta bazarındakı vəziyyət Mərkəzi Bankın təşkil etdiyi valyuta hərraclarının nəticələrindən də aydın olur. Belə ki, ilin əvvəlində keçirilən hərracların 98 faizində təklif tələbi üstələyib. Bu səbəbdən manatın üzərində heç bir ucuzlaşma təzyiq müşahidə olunmur.