Müharibə fonunda İrandan Türkiyəyə qaz ixracı dayanıb? - Baku TV

İsrailin dünyanın ən böyük qaz ehtiyatlarından biri olan “Cənubi Pars” yatağına zərbələr endirməsindən sonra Tehranın Türkiyəyə “mavi yanacaq” nəqlini dayandırdığı iddia edilsə də, Türkiyənin enerji və təbii sərvətlər naziri Alparslan Bayraktar bu məlumatı təkzib edib. Ancaq müharibənin davam etməsi fonunda İranın qardaş ölkəyə qaz nəqlindəki risklər aktuallığını saxlayır.

Bəs bu amil Türkiyənin əsas qaz təchizatçılarından biri olan Azərbaycanın qardaş ölkəyə “mavi yanacaq” ixracını artıra bilərmi?

Enerji məsələləri üzrə ekspert İlham Şaban ixracın artırılması üçün zəruri olan qaz həcmi ilə yanaşı, ötürmə infrastrukturu məsələsinə diqqət çəkib.

O qeyd edib ki, Azərbaycan hazırda Türkiyəyə qaz ixracı zamanı boru kəmərlərinin ötürmə potensialından maksimum səviyyədə istifadə edir:

“Hətta əlavə resurslarımız olsa belə, mövcud şəraitdə, yəni 2026-cı ilin birinci rübünün sonuna yaxınlaşdığımız bu dövrdə ixracı artıra bilmərik. Çünki kəmərlərimiz faktiki olaraq tam gücü ilə işləyir”.

Bununla belə, rəsmi məlumata görə, 2026-cı ilin yanvar ayında Azərbaycan Türkiyəyə 1 milyard 37,5 milyon kubmetr təbii qaz ixrac edib ki, bu, əvvəlki ilin eyni dövrü ilə müqayisədə 30 % çoxdur. Bununla da Azərbaycan ABŞ və Rusiyadan sonra Türkiyəyə ən çox qaz satan üçüncü ölkə olub. Bu dövrdə İranın Türkiyəyə qaz ixracının həcmi isə 130 milyon kubmetr təşkil edib. Bu, illik müqayisədə 30 %-dən çox azalma deməkdir. 2026-cı ilin yanvar ayında Türkiyənin qaz idxalında Azərbaycanın payı 13,43 %, İranın isə 1,68 % olub.