Pensiya alanların azalmasının səbəbi | İqtisadçıdan açıqlama

Azərbaycanda pensiya alanların sayında kəskin dəyişiklik var.

Rəsmi statistikaya görə, 2023-cü ildə əvvəlki illə müqayisədə ölkədə pensiyaçıların ümumi sayı 18 200 nəfər azalıb. Yaşa görə pensiya alanların sayı artsa da, əlilliyə və ailə başçısını itirməyə görə rəqəmlər aşağı düşüb.

İqtisadçı Rauf Qarayev əlilliyə görə pensiya alanların sayının azalmasını ölüm faktları ilə əlaqələndirib:

“Digər hallar isə qanunvericilikdə olan dəyişikliklə bağlıdır. Çünki bir çox hallarda biz müşahidə edirik ki, şəxslərə düzgün formada əlillik təyin olunmayıb və araşdırmalar nəticəsində onlar əlillikdən məhrum olunurlar. Bu da azalmaya səbəb olur. Digər hal isə ailə başçısını itirmiş şəxslərin vəfatı ilə bağlı ola bilər”.

Qeyd edək ki, Dövlət Statistika Komitəsinin məlumatına görə, 2023-cü ildə yaşa görə pensiya alanların sayı 2022-ci illə müqayisədə çox olsa da, əvvəlki illərə nisbətən azdır. Ümumilikdə isə 2018-ci ildən başlayaraq bütün növ pensiya alanların sayında azalma davam edir. Nəticədə ötən dövr ərzində onların sayı 17 faiz, başqa sözlə, 222 434 nəfər azalıb.