Qeyri-effektiv aqrar iqtisadiyyatın göstəricisi nədir?

“Kənddə yaşayan hər kəsin yalnız aqrar fəaliyyətlə məşğul olması düzgün yanaşma deyil”.

Bunu kənd təsərrüfatı naziri Məcnun Məmmədov Milli Məclisin Aqrar siyasət, Ailə, qadın və uşaq məsələləri, Elm və təhsil komitələrinin birgə iclasında deyib.

Nazirin sözlərinə görə, kəndlərdə alternativ məşğulluq imkanları yaradılmalıdır:

“Bu istiqamətdə sənaye, turizm, logistika kimi sahələri nümunə göstərə bilərik. Əks halda, kənd təsərrüfatına yalnız bu prinsiplə yanaşmaq qeyri-effektiv nəticələrə gətirib çıxarır".

O qeyd edib ki, hazırda Azərbaycanda bir təsərrüfata orta hesabla 1,7 hektar torpaq sahəsi düşür və bu, fermerin ailəsini il ərzində dolandırması üçün kifayət etmir:

“Hesablamalarımıza əsasən, fermerin minimum gəlir əldə etməsi üçün orta sahə 9 hektar olmalıdır. Dörd nəfərlik ailənin illik minimum gəliri təxminən 14 min manat təşkil edir. Bu məbləği qazanmaq üçün fermerin 9 hektar sahəyə sahib olması vacibdir. Taxılçılıqda bu göstərici 33 hektar, meyvəçilikdə isə 3-5 hektardır. Buna görə də kənd təsərrüfatında əsas istiqamətimiz məhsuldarlığın artırılması və əlavə dəyər yaradan məhsulların payının genişləndirilməsidir.

Dənli bitkilər əlavə dəyəri ən az olan məhsullar hesab olunur. Son 5 ildə isə təxminən 30 min hektar yeni meyvə bağları salınıb və bu bağlar həm məşğulluq, həm də gəlirlilik baxımından daha səmərəli sayılır”.