Serbiya prezidenti Azərbaycan şirkətinin inşa etdiyi sürət yolu ilə tanış olub | Vacib layihə

Serbiya Respublikasının Prezidenti Aleksandar Vuçiç Azərbaycanın “AzVirt” şirkətinin bu ölkədə inşa etdiyi Şabats-Loznitsa sürət yolunda işlərin gedişatı ilə tanış olub.

O, “həqiqətən də, fantastik iş görülüb” deyərək layihə üzrə hazırkı mərhələnin icrasını yüksək dəyərləndirib:

“AzVirt” işinin öhdəsindən əla gəlir. Çox sağ olsunlar ki, belə fantastik iş görüblər. İşçilər layihənin hər bir yerində səylə çalışırlar. Biz bu işi tam maliyyələşdiririk. Mənim son 12 illik təcrübəm onu göstərir ki, “AzVirt” bizim layihələrdə çalışan ən yaxşı 2 şirkətdən biridir”.

54,5 kilometr uzunluğunda olan bu yol Serbiya üçün vacib layihələrdəndir.

Prezident A.Vuçiç yeni yolun bu il dekabrın 15-də istifadəyə veriləcəyini açıqlayıb.

Qeyd edək ki, “AzVirt” ölkə daxilində, əsasən də Qarabağda bir çox layihələrin inşasını həyata keçirir. Füzuli Beynəlxalq Hava Limanı 2021-ci ildə rekord müddətə – cəmi 8 aya inşa olunaraq təhvil verilib. Zəngilan Beynəlxalq Hava Limanı 2022-ci ildə istifadəyə verilməklə Zəngəzur iqtisadi rayonunun ayrılmaz hissəsinə çevrilib.

Hazırda isə şirkət Laçın Beynəlxalq Hava Limanının inşası, Horadiz-Cəbrayıl-Zəngilan-Ağbənd, Əhmədbəyli-Füzuli-Şuşa, Kəlbəcər-Laçın avtomobil yollarının müəyyən olunan hissələrinin tikinti işlərini davam etdirməkdədir.