SOCAR-da rəqəmsal həllərin tətbiqi əməliyyat səmərəliliyinin artırılmasına töhfə verib - Baku TV

SOCAR 2025-ci ildə beynəlxalq aktivlər portfelini genişləndirib, enerji dəyər zəncirinin müxtəlif seqmentlərində mövqeyini gücləndirib və investisiya imkanlarını dəyərləndirərək yeni bazarlara açılıb. Bununla yanaşı, xərclərin optimallaşdırılması, müəssisələr arasında inteqrasiyanın gücləndirilməsi, maliyyə resurslarının effektiv idarə olunması, eləcə də innovativ və rəqəmsal həllərin tətbiqi əməliyyat səmərəliliyinin artırılmasına töhfə verib.

2025-ci ilin maliyyə nəticələrində əsas diqqətçəkən məqam mənfəət göstəricilərinin əhəmiyyətli dərəcədə yüksəlməsidir. Gəlirlərin 1,9 faiz artmasına baxmayaraq ümumi mənfəətin 70,5 faiz, əməliyyat mənfəətinin 80,1 faiz yüksəlməsi gəlirlilik və əməliyyat səmərəliliyi baxımından güclü nəticələri əks etdirir.

Eyni zamanda aktivlərin və kapitalın artması, uzunmüddətli öhdəliklərin isə azalması 2025-ci ilin nəticələrini yalnız mənfəətlilik baxımından deyil, balans göstəriciləri baxımından da fərqləndirir. Bu dinamika SOCAR-ın cari fəaliyyətini uğurla davam etdirməklə yanaşı, uzunmüddətli inkişaf və investisiya imkanlarını dəstəkləyən maliyyə bazasını qoruduğunu göstərir.