SOCAR Polymer ixrac siyahısında ön sıralarda

2025-ci ilin yanvar-iyul aylarında "SOCAR Polymer" MMC 157 milyon 900 min ABŞ dolları dəyərində qeyri-neft məhsulu ixrac edib.

Bu barədə İqtisadi İslahatların Təhlili və Kommunikasiya Mərkəzinin "İxrac İcmalı"nın avqust sayında bildirilir. Qeyd edilib ki, bu göstərici 2024-cü ilin müvafiq dövrü ilə müqayisədə 19 milyon 700 min dollar və ya 14,2 faiz çoxdur.

57 faizi SOCAR-a məxsus olan müəssisə hesabat dövründə dövlət şirkətləri arasında qeyri-neft-qaz ixracında ikinci olub. Birinci yerdə isə ənənəvi olaraq SOCAR-ın Marketinq və İqtisadi Əməliyyatlar İdarəsi qərarlaşıb.

Siyahıda Dövlət Neft Şirkətinə aid bir müəssisə isə “SOCAR- Dalğıc” MMC-dir. Hesabat dövründə Cəmiyyətin ixracı 1,9 milyon dollar təşkil edib.

Xatırladaq ki, bu ilin yanvar-iyul aylarında Azərbaycanın qeyri-neft sektoru üzrə ixracı 2024-cü ilin müvafiq dövrü ilə müqayisədə 11,4 faiz artaraq 2 milyard 90 milyon dollar təşkil edib.