SOCAR və “Qazprom” qaz sahəsində əməkdaşlığın perspektivlərini müzakirə edib

İyunun 7-də Sankt-Peterburq Beynəlxalq İqtisadi Forumu çərçivəsində “Qazprom” Açıq Səhmdar Cəmiyyətinin İdarə Heyətinin sədri Aleksey Millerlə Dövlət Neft Şirkətinin prezidenti Rövşən Nəcəf arasında işgüzar görüş keçirilib. Bu barədə “Qazprom” məlumat verib.

Tərəflər qaz sahəsində əməkdaşlığın inkişafı və perspektivlərini nəzərdən keçiriblər. Qlobal enerji bazarındakı vəziyyətə xüsusi diqqət yetirilib.

Aleksey Miller qeyd edib ki, “Qazprom”un rəsmi statistikasına əsaslanan hesablamalarına görə, 2023-cü ildə dünyada qaz istehlakı 15 milyard kubmetr artıb, 2024-cü ilin əvvəlindən isə istehlak artımı sürətlənib.

“Təbii qazın qlobal enerji bazarındakı rolu hər hansı real enerji inkişafı ssenarisi altında artmağa davam edəcək, o etibarlılıq, istifadə asanlığı, iqtisadi səmərəlilik və ekoloji faydaların birləşməsinə görə ən cəlbedici enerji mənbəyi olaraq qalacaq”, – deyə qurumun məlumatında vurğulanıb.