Yerli meyvə sortları niyə sıradan çıxır?

Son zamanlar bölgələrdə yeni intensiv meyvə bağlarının sayı durmadan artır. Bu bağlarda daha çox xaricdən gətirilən tinglər becərilir.

Fermerlər xarici sortlara üstünlük verməsinin səbəbini belə izah ediblər: “Xarici sortlar bizim iqlim şəraitinə uyğunlaşır, məhsuldarlıq yüksəkdir. Onlar həm də xəstəliyə davamlıdır”. Bütün bunlara baxmayaraq, xarici sortların yerli meyvələrdən geri qaldığı məqamlar da var.

Fermerlərin sözlərinə görə, xarici sortlar görünüşcə daha yaxşı olsa da, yerli meyvələr kimi dadlı deyil. Azərbaycan Dövlət Aqrar Universitetinin dosenti, meyvəçi alim Hüseyn İdrisov bildirib ki, bağlarda xarici sortlara üstünlük verilməsinin artması əsasən iqtisadi amillərlə bağlıdır:

“Fermer və sahibkarlarımız xaricdən müxtəlif sortlar, hibridlər gətirirlər. Onların heç kəs qabağını ala bilməz. Çünki fermer fikirləşir ki, bir hektara 25-30 min manat xərc qoyursa, üçüncü ildə məhsul götürməlidir. Bunun üçün 6-7 il gözləmək ona sərf etmir”.

Mütəxəssis onu da qeyd edib ki, bu bağların artmasını meyvənin bollaşması və ucuzlaşmasında müsbət amil kimi qiymətləndirmək olar.