"Dedi ki, hərbçiyə maşını vermişəm ki, satsın" | Avtomobil almaq istədi, dələduzluqla üzləşdi

Avtomobil almaq istəyən qadın dələduzluğun qurbanı olduğunu bildirir. Sevinc Quliyevanın sözlərinə görə, o, Gəncədən Sumqayıta gələrək etibarnamə ilə avtomobil alıb. Lakin bir müddət sonra avtomobilə verilmiş etibarnaməyə xitam verilib. Şikayətçi məsələ ilə bağlı hüquq-mühafizə orqanlarına müraciət edib.

Sevinc Quliyevanın sözlərinə görə, o, avqustun 4-də Sumqayıt şəhərində “Opel Corsa” markalı avtomobili 10 290 manata alıb. Alqı-satqı “mygov” portalı vasitəsilə rəsmiləşdirilib və avtomobil ümumi etibarnamə əsasında onun istifadəsinə verilib.

Avqustun 22-də isə avtomobilə verilmiş ümumi etibarnaməyə mülkiyyətçi tərəfindən xitam verildiyi məlum olub. Bundan sonra Sevinc Quliyeva avtomobili aldığı şəxs – Xəyal Mahmudovla əlaqə saxlayıb. Həmin şəxs avtomobili Daşkəsən rayon sakinlərindən aldığını bildirərək onların, eləcə də avtomobilin mülkiyyətçisinin əlaqə nömrəsini ona təqdim edib.

Şikayətçinin iddiasına görə, avtomobilin mülkiyyətçisi bildirib ki, nəqliyyat vasitəsini satmaq üçün hərbi qulluqçuya etibar edib və ondan 9000 manat tələb edib. Lakin həmin hərbi qulluqçu avtomobili sonradan Xəyal Mahmudova 7600 manata satıb və əldə etdiyi vəsaiti mülkiyyətçiyə ödəməyib.

Sevinc Quliyeva iddialarını təsdiqləyən səs yazılarının və digər sübutların olduğunu bildirir. Onun sözlərinə görə, hərbi qulluqçu həyat yoldaşı ilə əlaqə saxlayaraq problemi bir həftə ərzində həll edəcəyini desə də, nə ona, nə də avtomobilin mülkiyyətçisinə hər hansı ödəniş edib.