Dəhşətə gətirən mənzərə | “Baku TV”nin çəkilişindən sonra bələdiyyə təcili hərəkətə keçdi - Baku TV

Quba rayonunun Aşağı Atuc kəndində məişət tullantıları antisanitar vəziyyət yaradıb.

Kəndin bir neçə hissəsində zibil qalaqları uzun müddətdir yığılaraq qalıb.

Baku TV-nin qaynar xəttinə müraciət edən sakinlər aidiyyəti qurumlardan ərazilərin təcili təmizlənməsini tələb edirlər.

“İki dəfə öz hesabımıza buranı təmizləmişik. Nə gələn olub, nə də baxan”, – sakinlərdən biri bildirib.

“Mənim evimin yanı zibilxanaya çevrilib. Mal dərisi, qoyun ölüsü, heyvan cəmdəkləri – nə olur gətirib atırlar. İtlər də buraya toplaşır. Kənddə 1000-ə yaxın ev var. Bir tədbir görsünlər ki, bu natəmizlikdən qurtulaq”, – digər sakin deyib.

Qeyd edək ki, Baku TV-nin çəkilişi davam edərkən kənd bələdiyyəsinin əməkdaşları və texnika əraziyə gələrək təmizləmə işlərinə başlayıb.