Dələduzlar bu dəfə görün hansı yola əl atdı | Rəsmi qurumlar xəbərdarlıq etdi

Sosial şəbəkədə “Azərbaycan Sosial Yardım 2025” adlı saxta profil altında guya 3 399 manat ünvanlı sosial yardım almağa kömək göstərən səhifə təqdim edilir.

Dövlət Sosial Müdafiə Fondunun (DSMF) mətbuat katibi Rəşad Mehdili, əslində, bu kimi paylaşımların insanları aldadaraq vəsaitlərini ələ keçirmək məqsədi daşıdığını bildirib:

“Aztəminatlı ailələrə ünvanlı sosial yardım həmin ailələrin təmsilçiləri tərəfindən elektron qaydada edilmiş müraciət əsasında təyin olunur. Kiminsə müdaxiləsi və ya hər hansı sosial şəbəkə səhifəsinin köməyi ilə təyinat aparılmır”.

Məsələ ilə bağlı Daxili İşlər Nazirliyi vətəndaşlara sosial şəbəkələrdə saxta xidmətlər təqdim edən səhifələrə və paylaşımlara qarşı diqqətli olmağı, naməlum nömrələrdən gələn cəlbedici təklif və vədlərə inanmamağı, şəxsi və bank kartı məlumatlarını heç kimlə bölüşməməyi tövsiyə edib.