İş yerindəki mübahisə faciəyə səbəb oldu | Qətl törədən cinayətkara hökm oxundu - Baku TV

Bakıda iş yoldaşının başından stəkanla vurub onu öldürməkdə təqsirləndirilən Möhsün Abdullayevin cinayət işi üzrə məhkəmə istintaqı yekunlaşıb.

Bakı Ağır Cinayətlər Məhkəməsinin hakimi Elnur Nuriyevin sədrliyi ilə keçirilən iclasda hökm oxunaraq o, 9 il 6 ay azadlıqdan məhrum edilib.

Xatırladaq ki, ötən prosesdə prokuror təqsirləndirilənin 12 il 6 ay azadlıqdan məhrum edilməsini məhkəməyə təklif etmişdi.

Qeyd edək ki, ittihama görə, Möhsün Abdullayev iş yerində mübahisə zəminində masanın üzərindəki stəkanla iş yoldaşı Bahadur Tağıyevin başına bir neçə dəfə zərbə endirdikdən sonra yumruq və təpiklə də ona vurub. Bahadur Tağıyevə görə təcili tibbi yardım çağırılsa da, həkim briqadası hadisə yerinə çatanda o, artıq aldığı xəsarətlərdən həyatını itirib.

Möhsün Abdullayev Cinayət Məcəlləsinin 120.1-ci (qəsdən adam öldürmə) maddəsi ilə ittiham olunaraq barəsində həbs qətimkan tədbiri seçilib.