Milli İnternet Mükafatı "NETTY2024 Azərbaycan"ın qalibləri məlum oldu

NETTY Ümumdünya Şəbəkəsinin milli seqmentinin və ümumiyyətlə informasiya texnologiyaları bazarının inkişafı üçün yaradılan və bu sahədə Azərbaycanın birinci peşəkar mükafatıdır.

2004-cü ildən etibarən hər il bu mükafat ən yaxşı veb-resurslara, aktual İT layihələrə və Ümumdünya Şəbəkəsinin Azərbaycan seqmenti üçün məzmun yaratmaqda fəal iştirak edən şəxslərə verilir.

Mükafat qazananlar arasında həmkarlarımız – “BAKU.WS” İnformasiya Agentliyi də var.

“İki il əvvəl bu mükafatı almışdıq. İkinci dəfə qalib olmaq gözəl hissdir. Bu uğur bizim komandanın işidir. Başda rəhbərimiz Orxan Məmmədov olmaqla bütün komandanın uğurudur.

NETTY ailəsinə bizi qiymətləndirdiyi üçün təşəkkür edirəm. Bundan sonra daha böyük həvəslə işimizi davam etdirməyə calışacağıq”, – “BAKU.WS” İnstaqram departamentinin rəhbəri Şahin Həbibov deyib.

Qeyd edək ki, artıq 19-cu dəfədir ki, Bakıda NETTY Milli İnternet Mükafatının təqdimetmə mərasimi keçirilir. Ekspert şurası və virtual münsiflər heyəti milli media məkanının inkişafına verdiyi töhfələri qiymətləndirərək, Ümumdünya İnternet Şəbəkəsinin Azərbaycan seqmentində ən yaxşıları seçir. Ölkənin rəqəmsal mediasının imicini formalaşdıran layihələr öz layiqli mükafatlarını alır.