Mingəçevirdə energetikanın inkişafı və gələcək layihələr müzakirə olunub - Baku TV

“AzərEnerji” ASC və Mingəçevir Şəhər İcra Hakimiyyətinin birgə təşkilatçılığı ilə Mingəçevirdə 20 oktyabr – Energetiklər Gününə həsr olunan tədbir keçirilib.

Tədbirin Mingəçevirdə keçirilməsi xüsusi rəmzi məna daşıyıb. Azərbaycanın energetiklər şəhəri kimi tanınan Mingəçevir uzun illərdir ölkənin elektroenergetika sisteminin əsas mərkəzlərindən biridir.

Tədbir çərçivəsində Azərbaycan energetikasının keçdiyi inkişaf yolu, son illərdə “AzərEnerji” ASC tərəfindən həyata keçirilən genişmiqyaslı layihələr və enerji sisteminin gələcək inkişaf istiqamətləri barədə məlumat verilib.

Bildirilib ki, son illərdə ölkənin elektroenergetika sistemində böyük həcmdə yenidənqurma və modernləşdirmə işləri həyata keçirilib. Azərbaycanın energetika tarixində xüsusi yeri olan “Azərbaycan” İstilik Elektrik Stansiyasının 45 illiyinin tamam olduğu qeyd edilib. Eyni zamanda Mingəçevirdə yaradılan müasir “8 Noyabr” Elektrik Stansiyasının ölkənin generasiya imkanlarının artırılması, enerji sisteminin etibarlılığının və dayanıqlılığının gücləndirilməsi baxımından əhəmiyyəti qeyd olunub.

Tədbirdə Ulu Öndər Heydər Əliyevin elektroenergetika sahəsində gördüyü işlərə həsr olunan “Müstəqil energetikanın banisi” adlı film nümayiş olunub. Həmçinin “Azərbaycan enerjisisteminin arxitekturası” kitabının təqdimatı keçirilib.

Tədbirin sonunda energetika sahəsində uzunmüddətli və səmərəli fəaliyyəti ilə fərqlənən əməkdaşlar fəxri fərman və qiymətli hədiyyələrlə təltif olunublar. Gənc nəslin energetika sahəsinə marağının artırılması məqsədilə tələbələr də mükafatlandırılıb.