"Abadlaşdırırıq" dedilər, hamısı yoxa çıxdı" | 5 binanın həyəti söküldü, sonra isə... - Baku TV

Baku TV-yə daxil olan şikayət əsasında məlum olub ki, Nizami rayonu, Bəhruz Nuriyev küçəsində yerləşən beş binanın həyəti abadlaşdırılmaq məqsədilə sökülüb. Lakin işlər yarımçıq saxlanılıb.

Sakinlərin sözlərinə görə, yay aylarında həyətə yayılan toz-torpaq, qışda isə yaranan palçıq səbəbindən ərazidə hərəkət etmək çətinləşir. Uşaqların oynaması üçün meydançanın olmaması da narazılığı artırır.

Onlar bildirirlər ki, həyətin bu vəziyyətdə olması həm də təhlükə yaradır.

Sakinlərin sözlərinə görə, aidiyyəti qurumlara dəfələrlə müraciət etsələr də, problem həllini tapmayıb.

“Şikayətim məhlədəndir. Məhləyə üç aydır ki, heç yaxın durmurlar. Heç nə etmirlər. Bloklar da bərbad vəziyyətdədir. Bütün toz-torpaq evimizin içindədir. Kondisionerlərin üstünə də toz yığılır. Oturmağa yer tapa bilmirik, ayaq üstə qalmışıq”, – sakinlərdən biri bildirib.

Digər sakin isə qeyd edib ki, binanın arxasında da eyni vəziyyət hökm sürür:

“Burada gördüyünüz mənzərənin eynisi bu binanın arxasındadır. Böyük bir sahədə eyni iş görülüb. İki aydır yarımçıq qoyulub. Əvvəllər burada üç söhbətgah var idi. Hamısını sökdülər. Dedilər ki, abadlıq işləri aparılacaq. Bütün binanın bloklarında da işlər yarımçıq qalıb. Tikinti materiallarını binanın arxasına yığdılar, sonra isə hamısı yoxa çıxdı”.