Bu ölkədə son 40 ilin ən şiddətli qar fırtınası baş verdi

Yaponiyada güclü qar 30-dan çox vətəndaşın ölümünə səbəb olub. 100-ə yaxın şəxs ağır yaralanıb.

Yerli hakimiyyət orqanlarının məlumatlarına görə, ölənlər arasında qarı təmizləyərkən damdan yıxılanlar, uçqunun altında qalanlar da var.

Bundan əlavə, Niiqata prefekturasında yerli sakinlərdən biri öz evinin dağıntıları altında qalaraq əzilib.

Əsgərlər və qar təmizləyənlər rekord qıran qarı təmizləmək üçün mübarizə aparıblar. Hokkaydo bölgəsinin ən böyük şəhəri olan Sapporoda 3800 kilometrlik yoldan qarı təmizləmək üçün təxminən 1000 qar təmizləyən maşından istifadə edilib.

Yaponiyanın şimal şəhərlərində vəziyyət daha kritikdir. Məlumata görə, bəzi rayonlarda məktəblər günlərdir bağlıdır.

Qeyd edək ki, bu, Yaponiyada son 40 ilin ən şiddətli qar fırtınasıdır.