Kiyev və Vaşinqton Ukraynanın bərpası və sülh planını müzakirə edib

Ukrayna Prezidenti Volodimir Zelenski ABŞ-nin maliyyə naziri Skott Bessent, Donald Trampın kürəkəni Cared Kuşner və "BlackRock"un baş direktoru Larri Finklə onlayn söhbət edib.

Bu barədə Zelenski öz teleqram kanalında məlumat verib.

"Komandamla birlikdə Amerika tərəfi – Skott Bessent, Cared Kuşner və Larri Finklə məhsuldar söhbət apardım. Bu, mahiyyət etibarı ilə Ukraynanın iqtisadi dirçəlişi ilə bağlı sənəd üzərində işləyəcək qrupun ilk iclası idi", – deyə o bildirib.

Tərəflər ölkənin bərpasının əsas aspektləri və mexanizmləri barədə fikir mübadiləsi aparıblar. Ukrayna liderinin sözlərinə görə, çoxlu inkişaflar var ki, düzgün yanaşma ilə onları həyata keçirmək olar.

Zelenski bəyan edib ki, Kiyev Rusiya-Ukrayna müharibəsinə son qoymaq üçün fundamental sənədin 20 əsas bəndi üzrə öz baxışını hazırlayıb.