Lavrov və Rubio arasındakı telefon danışığının detalları

Rusiyanın xarici işlər naziri Sergey Lavrovla ABŞ dövlət katibi Marko Rubio telefon danışığında Ukrayna münaqişəsi və İran ətrafındakı vəziyyətlə bağlı fikir mübadiləsi aparıblar.

Bu barədə ABŞ Dövlət Departamentinin sözçü müavini Tommi Piqottun yazılı açıqlamasına istinadən məlumat yayılıb.

“ABŞ dövlət katibi Marko Rubio bu gün Rusiyanın xarici işlər naziri Sergey Lavrovla nazirin sorğusu əsasında telefon danışığı aparıb. Tərəflər Rusiya-Ukrayna müharibəsi, ikitərəfli münasibətlər və İran ətrafındakı vəziyyət barədə fikir mübadiləsi aparıblar”, – açıqlamada bildirilib.

Qeyd edək ki, daha əvvəl Rusiya Xarici İşlər Nazirliyi Sergey Lavrovun ABŞ tərəfinə Rusiya Silahlı Qüvvələrinin Kiyevdə həyata keçirdiyi addımlar barədə məlumat verdiyini açıqlamışdı. Lavrovun telefon danışığında ABŞ tərəfinə Ankoric razılaşmaları ilə bağlı mövqeni də xatırlatdığı bildirilirdi.