Qızılı parça 2 min il idi ki, yoxa çıxmışdı

Cənubi Koreya alimləri 2 min ildir itmiş hesab edilən əfsanəvi qızılı parçanı yenidən yaradıblar.

Əsrlər boyu bisson kimi tanınan parıltılı qızılı parça dünyanın ən eksklüziv dəbdəbə materiallarından biri hesab olunub və yalnız imperatorlar, papalar və digər nüfuzlu şəxslər üçün nəzərdə tutulub.

Bu yaxınlarda Cənubi Koreyanın Elm və Texnologiya Universitetinin professorları "Atrina pectinata" növündən olan molyusklardan istifadə etməklə bissona bənzər qızılı lif hazırlayıb. Alimlər həmçinin bu lifin qızılı rənginin zaman keçdikcə niyə solmadığını izah ediblər.

Qədim Roma imperiyası dövründə material nəcib pinna adlanan molyuskun istehsal etdiyi bissus saplarından hazırlanırdı. Son onilliklərdə dəniz mühitinin çirklənməsi və ekoloji vəziyyətin pisləşməsi nəticəsində nəcib pinna yox olmaq təhlükəsi ilə üzləşib. Buna görə də Avropa İttifaqı bu molyuskun ovlanmasını tamamilə qadağan edib. Nəticədə orijinal bisson son dərəcə nadir materiala çevrilib.

Alimlər müəyyən ediblər ki, rəng boyalar hesabına deyil, struktur rənglənməsi adlanan hadisə nəticəsində yaranır. Bu zaman mikroskopik strukturlar işıqla qarşılıqlı təsirə girərək rəng əmələ gətirir.