Rusiya XİN | "Bu cür addımlar ağır nəticələr verəcək" - Baku TV

"İranın daxili siyasi proseslərinə müdaxilə Yaxın Şərqdə təhlükəsizliyə mənfi təsir edəcək".

Bu barədə Rusiya Xarici İşlər Nazirliyinin məsələ ilə bağlı açıqlamasında bildirilir.

Məlumatda İran İslam Respublikasına qarşı yeni zərbələr endirmək təhdidlərinin qəbuledilməz olduğu vurğulanır.

"Xaricdən ilhamlanan iğtişaşlardan 2025-ci ilin iyun ayında İrana qarşı törədilən təcavüzü təkrarlamaq üçün bəhanə kimi istifadə etməyi planlaşdıranlar bu cür addımların Yaxın Şərqdəki vəziyyət və qlobal beynəlxalq təhlükəsizlik üçün ağır nəticələr verəcəyindən xəbərdar olmalıdırlar. Həmçinin ticarət rüsumlarını artırmaqla İranın xarici tərəfdaşlarını şantaj etmək cəhdləri qəbuledilməzdir", – deyə Xarici İşlər Nazirliyinin açıqlamasında deyilir.

Qeyd edək ki, İranda hazırkı genişmiqyaslı etiraz dalğası 2025-ci il dekabrın sonlarında, xüsusilə dekabrın 28-dən başlayaraq bir çox əyalətləri əhatə edib. İqtisadi böhranla başlayan aksiyalar daha sonra hakimiyyət əleyhinə kütləvi şüarlarla davam edib. 2026-cı ilin yanvarında etirazlar daha kəskin mərhələyə keçib və çoxsaylı ölümlərlə müşayiət olunub.