Tramp və Netanyahu arasında telefon danışığı olub | ”Yaxın Şərqin simasını dəyişəcəyik” - Baku TV

"ABŞ Prezidenti Donald Tramp İrana çox güclü iqtisadi və hərbi təzyiq göstərir".

Bunu İsrailin Baş naziri Benyamin Netanyahu "X" sosial şəbəkəsindəki videomüraciətində bildirib.

O qeyd edib ki, Trampla bu yaxınlarda telefon danışığı aparıb.

"Mən sizə söz vermişdim ki, biz Yaxın Şərqin simasını dəyişəcəyik və məhz bunu da edirik. İlk növbədə İran. Prezident Trampla əla danışığım oldu. O, İrana çox güclü təzyiq göstərir – həm iqtisadi, həm də hərbi. Biz tam koordinasiyada fəaliyyət göstəririk", – deyə Netanyahu bildirib.

O əlavə edib ki, analoji yanaşma Livana münasibətdə də tətbiq edilir. Onun sözlərinə görə, İsrail Livanla tarixi sülh prosesinə başlayıb, lakin "Hizbullah" qruplaşması bunu pozmağa çalışır.

"Biz istənilən təhdidə qarşı tam fəaliyyət azadlığını qoruyub saxlayırıq. Dünən hücum etmişik və bu gün də hücum edirik. Biz İsrailin şimal sakinlərinin təhlükəsizliyini bərpa etməkdə qərarlıyıq", – deyə Netanyahu əlavə edib.