“Yeni məhdudiyyətlərə tam hazırıq” | İrandan reaksiya

"İran hökuməti ABŞ-nin İslam Respublikasına qarşı sanksiyaların sərtləşdirilməsinə, yeni məhdudiyyətlər tətbiq etməsinə hazır idi və potensial problemlərin öhdəsindən gəlmək üçün əvvəlcədən plan hazırlayıb".

Bunu İranın iqtisadiyyat naziri Seyid Əli Mədənizadə bildirib.

"Ölkə hökuməti ABŞ sanksiyalarına qarşı necə çıxacağını əvvəlcədən planlaşdırıb və yeni məhdudiyyətlərə tam hazırdır", – deyə "Tasnim" agentliyi nazirdən sitat gətirib.

Nazir izah edib ki, kabinetin iki illik iqtisadi inkişaf planı var və orada bütün problemlər nəzərə alınıb. Onun sözlərinə görə, Vaşinqton İran iqtisadiyyatının damarlarını kəsməklə məqsədlərinə çata bilməyəcək.

Eyni zamanda iranlı naziri qeyd edib ki, müharibə sənayeyə, xüsusən metallurgiya zavodlarının fəaliyyətinə təsir edib. "Lakin biz onları bərpa etdik və ölkəni müdafiəsinə davam edirik", – deyə Mədənizadə fikirlərini yekunlaşdırıb.