Naxçıvanda göldə boğulan iki gənc torpağa tapşırıldı | Arzuları ilə birlikdə dəfn olundular

Naxçıvanda göldə boğulan tələbələr Astarada dəfn ediliblər.

Naməlum şəraitdə “Bazar göl”ə yıxılaraq həyatını itirən 19 yaşlı Fəttah Zəkəriyəyev və 18 yaşlı Əli Mehrəliyevin nəşi doğulduqları Astara rayonunun Pensər kəndinə gətirilib.

Ailələri ilə vida mərasimindən sonra onlar kənd qəbiristanlığında torpağa tapşırılıb.

“Dediklərinə görə, hadisə gecə saatında olub. Uşaqlardan birinin telefonu suya düşüb. Telefonu götürmək məqsədilə gedib, sürüşüb gölə. Yoldaşı görüb ki, dostu boğulur, ona kömək etmək üçün suya düşüb, hər ikisi də orada boğulub”, – kənd sakini deyib.

Qeyd edək ki, Fəttah Zəkəriyəyev və Əli Mehrəliyev Naxçıvan Dövlət Universitetinin tələbələri olub. Hazırda fakt üzrə Naxçıvan şəhər prokurorluğunda araşdırma aparılır.