Övlad sevinci faciə ilə bitdi | 53 yaşlı ananın dünyaya gətirdiyi əkizlər isə... - Baku TV

Sabunçuda yerləşən 2 nömrəli doğum evində bədbəxt hadisə baş verib.

Martın 14-də 34 həftəlik hamilə olan Mətanət Mirzəyeva Doğum şöbəsinə yerləşdirilib və əkiz övlad dünyaya gətirib. Lakin ertəsi gün gecə saatlarında xəstənin vəziyyəti ağırlaşıb. Reanimasiya şöbəsinə yerləşdirilən xəstənin həyatını xilas etmək mümkün olmayıb. 53 yaşlı qadın qanaxma səbəbindən dünyasını dəyişib.

Sabunçu Tibb Mərkəzindən bildirilib ki, qadının ölüm səbəbi araşdırılır. Meyit təhqiqat aparılması üçün aidiyyəti üzrə təhvil verilib və ölümün dəqiq səbəbi patoloji-anatomik müayinə nəticəsində müəyyənləşdiriləcək.

Qeyd edək ki, yenidoğulmuşların müalicəsi davam etdirilir, vəziyyətləri stabil olaraq qiymətləndirilir.