Bakının siyasi nüfuzu yeni qazanclara yol açır? - Baku TV

Asiya dünyanın iqtisadi ağırlıq mərkəzinə çevrilir. Azərbaycan isə bu coğrafiyanın aparıcı güclərini bir araya gətirən platformada sədrliyi və diplomatik fəallığı ilə diqqət çəkir. Hindistan-Pakistan, İran və İsrail arasında ziddiyyətlərin mövcud olduğu bir şəraitdə bu əməkdaşlığın nə dərəcədə effektiv olacağı və Azərbaycanın hansı iqtisadi dividendlər əldə edə biləcəyi maraq doğurur.

İqtisadçı Emin Qəribli hesab edir ki, belə platformalar beynəlxalq iqtisadi münasibətlərin yeni modelinin formalaşmasına və orta güclər arasında əməkdaşlığın genişlənməsinə şərait yaradır.

Onun sözlərinə görə, ənənəvi beynəlxalq iqtisadi institutların təsir imkanlarının zəiflədiyi bir dövrdə alternativ əməkdaşlıq formatlarının əhəmiyyəti artır:

“Dünyada yeni təşkilatların yarandığını və köhnə sistemə alternativlərin formalaşdırılmasına cəhdlər edildiyini görürük. Bu platformanın nisbətən kiçik ölkələr tərəfindən yaradılması və orta güclərin əməkdaşlığına əsaslanması onun dayanıqlılığı baxımından əhəmiyyətlidir”.

İqtisadçı Azərbaycanın bu platformadakı mövqeyinin nəqliyyat-logistika əlaqələrinin inkişafı, investisiyaların cəlb edilməsi və rəqəmsal infrastrukturun gücləndirilməsi baxımından mühüm imkanlar yaratdığını vurğulayıb.

“Şərq ölkələri Avropa ilə ticarət əlaqələrini genişləndirmək üçün Orta Dəhlizə xüsusi əhəmiyyət verir. Bu tədbirlərin Azərbaycanda keçirilməsi həmin marşruta diqqətin artırılmasına və yeni investisiyaların cəlbinə xidmət edə bilər. Burada söhbət təkcə maliyyədən deyil, həm də yeni texnologiyalardan və rəqəmsal sistemlərin qurulmasından gedir”, – Emin Qəribli bildirib.