Dövlət şirkətləri büdcəyə nə qazandıracaq? - Baku TV

Gələn il Azərbaycanda 40-dan çox dövlət müəssisəsi tərəfindən büdcəyə təxminən 900 milyon manat dividend ödənilməsi nəzərdə tutulur. Bu barədə maliyyə naziri Sahil Babayev məlumat verib.

Yeni dividend siyasətinin dövlət vəsaitlərinin idarə edilməsində şəffaflığı artıracağı və maliyyə nəzarətini gücləndirəcəyi gözlənilir.

Maliyyə Nazirliyi yanında İctimai Şuranın üzvü Eyyub Kərimli bildirib ki, dövlət maliyyəsinin idarə edilməsində rəqəmsallaşma prosesi çərçivəsində vahid elektron sistemlərin yaradılması istiqamətində işlər görülür.

Onun sözlərinə görə, dividend hesabatlarının elektronlaşdırılması üçün artıq 1300-ə yaxın müəssisə müraciət edib.

“Bu, gələcək illərdə dövlət müəssisələri tərəfindən büdcəyə dividend ödənilməsini təmin edəcək. Həm müəssisələrin fəaliyyətinin səmərəli qurulmasına, həm də büdcənin şəffaf formalaşmasına ciddi təsir göstərəcək”, – Eyyub Kərimli qeyd edib.

İqtisadçı əlavə edib ki, əvvəlki illərdə bəzi dövlət müəssisələri mənfəətlə işləsə də, büdcəyə dividend ödənişləri ya həyata keçirilməyib, ya da gözləniləndən az olub. Onun fikrincə, buna maliyyə idarəçiliyindəki çatışmazlıqlar, nəzarət mexanizmlərinin zəifliyi və məlumat çatışmazlığı təsir göstərib.

E.Kərimli hesab edir ki, vahid elektron platforma maliyyə pozuntularının qarşısının alınmasına, müəssisələrin gəlirlərinin daha dəqiq müəyyənləşdirilməsinə və dividend ödənişlərinə nəzarətin gücləndirilməsinə kömək edəcək.

İctimai Şuranın üzvünün sözlərinə görə, yeni yanaşmanın effektivliyi yalnız büdcəyə ödənilən dividendlərin həcmi ilə deyil, həm də müəssisələrin fəaliyyətinin monitorinqi, idarəetmənin optimallaşdırılması və maliyyə hesabatlılığının təkmilləşdirilməsi ilə ölçüləcək.