ABŞ-nin İranda əsas strategiyası nədir? - Baku TV

ABŞ və İran arasında müharibə artıq günlərdir ki, davam edir. Vaşinqton hücum strategiyasını açıqlasa da, bu strategiyanın hansı nəticələrə hesablandığı hələ də dəqiq məlum deyil.

Belə ki, İranın hərbi obyektlərlə yanaşı, mülki obyektlərə, hotellərə və mənzillərə zərbə endirdiyi faktı “müqavimətə” və ölkənin Müdafiə Nazirliyinin də açıqladığı kimi, “tükəndirmə” siyasətinə hesablanıbsa, ABŞ-nin hücumları məqsədəuyğun olaraq hərbi hədəflərə yönəlib. Administrasiyanın bundan sonrakı prioritetləri isə sual altındadır.

Bəs ABŞ-nin əsas planı nədir?

Milli Məclisin deputatı Arzuxan Əlizadə bildirib ki, müharibənin ilk günlərindən İranda rejim dəyişikliyinin əsas məqsəd olduğu vurğulanır.

Onun sözlərinə görə, rejim dəyişikliyi hədəflərin sonu demək deyil və proses daha geniş məqsədləri əhatə edə bilər.

Deputat qeyd edib ki, söhbət İranda daha uyğun hesab edilən siyasi sistemin formalaşdırılmasından gedir. O həmçinin ABŞ Prezidenti Donald Trampın İran xalqının öz daxilindən lider seçməsi imkanının tanınması ilə bağlı mövqe sərgilədiyini xatırladıb.

A.Əlizadə vurğulayıb ki, mümkün rejim dəyişikliyindən sonra ölkə daxilində sistem transformasiyası gündəmə gələ bilər. Onun fikrincə, İranın mövcud potensialı, xüsusilə enerji daşıyıcıları və yanacaq ehtiyatları əsas hədəflərdən biridir.

Analitik bildirir ki, Venesuelada bu cür resurslara əlçatanlıq necə təmin olunubsa, eləcə də İranın neftinə, resurslarına əlçatanlıq imkanları gələcək strategiyanın əsas parçasıdır.