Ayxan Hacızadədən İran XİN-in əsassız iddialarına cavab | “Bu barədə heç bir məlumat...”

“İran Xarici İşlər Nazirliyinin sözçüsü İsmayıl Bəqainin Azərbaycanda saxlanılan iranlı məhbuslara pis rəftar edildiyi ilə bağlı səsləndirdiyi iddiaların heç bir hüquqi və faktiki əsası yoxdur”.

Bu barədə Azərbaycan Xarici İşlər Nazirliyinin mətbuat katibi Ayxan Hacızadə açıqlama verib.

Onun sözlərinə görə, bütün İran vətəndaşları ilə bağlı məlumatlar “Konsulluq əlaqələri haqqında” Vyana Konvensiyasına uyğun şəkildə rəsmi olaraq İran tərəfinə təqdim olunur.

Ayxan Hacizadənin sözlərinə görə, İran vətəndaşı olan məhkumlara telefonla danışmaq, bağlama almaq, ailə üzvləri ilə görüşmək və hətta bəzi hallarda videobağlantı əsasında ünsiyyət qurmaq imkanları yaradılıb.

Həmçinin bu şəxslər mütəmadi olaraq tibbi müayinələrdən keçirilir, İran səfirliyi tərəfindən gətirilmiş dərman preparatları isə normativ tələblərə uyğun şəkildə məhkumlara çatdırılır.

2025-ci il ərzində İran səfirliyinin əməkdaşları ilə penitensiar müəssisələrdə cəza çəkən 37 İran vətəndaşı arasında konsul görüşlərinin keçirilməsinə şərait yaradılıb. Sonuncu belə görüş iyulun 31-də iki İran vətəndaşı ilə baş tutub.