Bakı-İrəvan münasibətlərində yeni səhifə? | Regional kommunikasiyaların bərpası - Baku TV

Ermənistan 2030-cu ilə qədər Azərbaycan və Türkiyə ilə sərhədlərin, eləcə də nəqliyyat kommunikasiyalarının açılacağına ümid edir.

Bu barədə Ermənistanın xarici işlər nazirinin müavini Vaan Kostanyan bildirib.

Onun sözlərinə görə, regional kommunikasiyaların bərpası Cənubi Qafqazın Avropa ilə Mərkəzi Asiya arasında əsas əlaqələndirici körpülərdən birinə çevrilməsinə imkan verəcək:

"Bizim baxışımız bundan ibarətdir ki, 2030-cu ilə qədər təəssüf ki, sərhədlərin indiyədək bağlı olduğu iki qonşumuzla, Türkiyə və Azərbaycanla açıq kommunikasiyalarımız, həmçinin açıq sərhədlərimiz olacaq".

Kostanyan regional nəqliyyat layihələri üzərində işlərin davam etdiyini və qonşu ölkələr tərəfindən daha çox səmimilik nümayiş etdiriləcəyi təqdirdə bu prosesin daha da tez baş verə biləcəyini qeyd edib.

Nazir müavini nəqliyyat əlaqələrinin genişlənməsinin həm iqtisadi əməkdaşlığın inkişafına, həm də bölgədə sabitliyin möhkəmlənməsinə mühüm töhfə verəcəyini vurğulayıb.