İran Şahının oğlundan İsrailə tarixi səfər

İran Şahının böyük oğlu Rza Pəhləvi İsrailə səfər edib.

O, Baş nazir Benyamin Netanyahu ilə görüşüb. Görüş Qüdsün ən yüksək nöqtəsində yerləşən, İsrailin Holokost qurbanlarının xatirəsinə ucaldılan abidə kompleksi “Yad Va Şem”də baş tutub.

Bu barədə “i24NEWS” məlumat yayıb. Görüşdə Benyamin Netanyahu və Rza Pəhləvinin həyat yoldaşları da iştirak ediblər.

İran Şahının oğlu “Yad Vaşem”də Holokost qurbanlarının xatirəsinə təşkil edilən mərasimə də qatılıb. O, tədbirdə İsrailin Baş naziri və Prezidenti ilə yanaşı dayanıb, lakin özü çıxış etməyib.

Qeyd edək ki, muzeyi tərk edərkən Rza Pəhləvi İsrail mətbuatına açıqlama verib. O vurğulayıb ki, tədbirdə iştirak etməyi və Holokost qurbanlarının xatirəsini ehtiramla yad etməyi özünə borc bilib.