Mariya Zaxarova: Bu sual bizə yox, Ermənistana verilməlidir

Rusiya Xarici İşlər Nazirliyi Azərbaycanın Qarabağ bölgəsindəki qondarma rejimin keçmiş liderləri Arkadi Qukasyan, Bako Saakyan, Araik Arutyunyan və “dövlət naziri” Ruben Vardanyanın həbsinə münasibət bildirib.

XİN-in sözçüsü Mariya Zaxarova keçirdiyi brifinqdə erməni jurnalistin separatçıların “liderləri”nin və R.Vardanyanın geri qaytarılması üçün Moskvanın hansısa tədbir görüb-görməyəcəyinə dair səsləndirdiyi suala lakonik cavab verib.

“Siz, deyəsən, qarışdırırsınız. Bu sual bizə yox, Ermənistan tərəfinə verilməlidir. Həmin şəxslər Ermənistan vətəndaşlarıdır”, – Rusiya XİN sözçüsü vurğulayıb.

M.Zaxarova onlardan birinin – Ruben Vardanyanın Rusiya vətəndaşı olduğunu, daha sonra isə vətəndaşlıqdan imtina etdiyini də xatırladıb.