Müdafiə Nazirliyinin rəhbərliyi Türkiyədə səfərdə | Detallar açıqlandı

Azərbaycanın müdafiə naziri general-polkovnik Zakir Həsənov və Nazirliyin digər rəhbər heyəti Türkiyə Respublikasının milli müdafiə naziri cənab Yaşar Gülerin dəvəti ilə qardaş ölkədə səfərdədir.

Bu barədə məlumatı Müdafiə Nazirliyi yayıb.

Bildirilib ki, Müdafiə Nazirliyinin rəhbər heyəti İstanbul şəhərində keçirilən “IDEF 2025” 17-ci Beynəlxalq Müdafiə Sənayesi Sərgisinin açılış mərasimində iştirak etmək üçün yollanıb.

Açılış mərasimində Türkiyə Prezidenti Rəcəb Tayyib Ərdoğan çıxış edərək tədbir iştirakçılarını salamlayıb.

Qeyd edək ki, müdafiə nazirinin qardaş ölkəyə səfəri çərçivəsində sərgidə nümayiş etdiriləcək hərbi silah və texnika ilə tanışlıq, həmçinin bir sıra görüşlərin keçirilməsi planlaşdırılıb.