2018-ci ilin qisası | Petrosyan niyə Paşinyanı hədəfə alıb?

“Ermənistan Baş naziri Nikol Paşinyan Azərbaycanla sülhə qarşı çıxan sabiq prezident Levon-Ter Petrosyanı bağışlamayacaq”.

Bunu Ermənistanın hakim “Vətəndaş Müqaviləsi” Partiyasının deputatı Arusyak Julhakyan deyib.

Siyasətçi Ermənistanın keçmiş prezidentinin açıq şəkildə sülh prosesinə qarşı çıxdığını, ABŞ-də Bakı və İrəvan arasında əldə edilmiş razılaşmaya kölgə salmağa çalışdığını, Rusiyanı bunun qarşısını almaq üçün fəallaşmağa çağırdığını bildirib.

Julhakyan qeyd edib ki, Petrosyan vaxtilə “sülh və mehriban qonşuluq”dan danışsa da, bu gün tamamilə əks mövqe sərgiləyir:

“Sülh, barışıq, mehriban qonşuluq” şüarının müəllifi, “qonşularla normal münasibətlərin böyük tərəfdarı” olan birinci prezident avqustun 8-də regionda sülhün və sabitliyin bərqərar olması istiqamətində atılan nəhəng addımı dəyərləndirməli, ən azı, əldə olunmuş razılaşmaların müsbət və mənfi tərəflərindən danışmalı idi. Bu arada, bu 10 gün ərzində Ter-Petrosyan üç dəfə çıxış edib, birinci dəfə Rusiyanın niyə susmasından, ikinci dəfə isə “Ermənistan tarixi, yoxsa erməni tarixi?” mövzusundan, üçüncüsündə də Qarabağ ermənilərinin niyə susmasından və küçələrə çıxıb etiraz etməmələrindən danışıb”.