ABŞ-dən Azərbaycan-Ermənistan sülhü ilə bağlı müsbət açıqlama

“ABŞ Cənubi Qafqazda sülhün mümkün olduğuna inanır”.

Bunu ABŞ Dövlət Departamentinin mətbuat katibinin müavini Vedant Patel keçirdiyi brifinqdə deyib. Onun sözlərinə görə, ABŞ Cənubi Qafqaz regionunda sülhsevər gələcəyə nail olmaq istəyir.

“Bu səbəbdən bu həftə danışıqlar prosesini asanlaşdırmaq məqsədilə Cənubi Qafqaz regionunda sülhün təmin edilməsi üçün çalışan Azərbaycanın xarici işlər naziri Ceyhun Bayramov və Ermənistanın xarici işlər naziri Ararat Mirzoyanı qəbul etməkdən məmnunuq. Sülh prosesində ABŞ Dövlət Departamentinin Qafqaz danışıqları üzrə baş müşaviri Lui Bono da fəal iştirak edir. Biz bu məsələni diqqətdə saxlamağa davam edəcəyik”, – deyə Vedant Patel bildirib.

“Birbaşa dialoq problemlərin həlli və davamlı sülhə nail olmaq üçün açardır” deyən V.Patel qeyd edib ki, Azərbaycan və Ermənistan arasında aparılan danışıqların gedişatı iki ölkənin verəcəyi qərardan asılı olacaq.