ABŞ-nin Azərbaycandakı səfiri 907-ci düzəlişdən danışdı

"ABŞ Azadlığa Dəstək Aktına 907-ci düzəliş 30 il əvvəl qəbul edilmiş qanunun bir hissəsidir və Bakı ilə Vaşinqton arasında münasibətlərdə kiçik amildir".

"Trend"in məlumatına görə, bunu ABŞ-nin Azərbaycandakı səfiri Mark Libbi bu gün keçirilən mətbuat konfransında bildirib.

"30 il əvvəl mən bu işdə deyildim. Bu qanunvericiliyi düzəldə bilmərəm. Hər il biz müəyyən növ təhlükəsizlik yardımı göstərmək üçün 907-ci düzəlişdən yayınmağın lazım olub-olmadığı barədə düşünürük, amma bu hələ nəzərdən keçirilir. Onu da qeyd etməliyəm ki, 907 saylı düzəliş Azərbaycanla əməkdaşlıq üçün yeganə yol deyil. Mən hələ də bunun nə üçün inanılmaz dərəcədə vacib olduğunu tam başa düşə bilmirəm.

Bu münasibətlərimizin geniş spektri baxımından və Azərbaycanla qarşılıqlı fəaliyyətimiz baxımından bütün sahələrdə, mədəni, iqtisadi və hətta müəyyən dərəcədə təhlükəsizlik sahəsində əməkdaşlıq baxımından kiçik amildir. Bu, bəzi növ hərbi yardımları məhdudlaşdırır. Azərbaycanın ABŞ-nin hərbi yardımına ehtiyacının olub-olmadığını bilmirəm, çox güman ki, yoxdur", – ABŞ-nin Azərbaycandakı səfiri belə deyib.

Səfir qeyd edib ki, bu, iki ölkənin prioritetləri kontekstində diqqətlə nəzərdən keçirilməli olan məsələdir.

"Bu il bu məsələ ilə bağlı heç bir qərar verilməyib. Amma Azərbaycanla bağlı edə biləcəyimiz başqa işlər də var. Biz Azərbaycanın ərazi bütövlüyünü dəstəkləyirik. Ermənistanın da ərazi bütövlüyünü dəstəkləyirik. Ərazi bütövlüyü bizim əsas prinsipimiz olub", – Mark Libbi vurğulayıb.