ABŞ-nin Yaxın Şərqdə siyasəti qanla bitəcək?

Yaxın Şərqdə növbəti təhlükə İranın qapısını döyə bilər.

Bu ehtimalı daha çox qüvvətləndirən isə İsrail Müdafiə Qüvvələrinin yeni Baş Qərargah rəisi Eyal Zamirin son bəyanatlarıdır.

O bildirib ki, 2025-ci il Qəzza və İrana fokuslanan müharibə ili olacaq. Eyal Zamir son illərdə İsrail Ordusunun əsasən nisbi qələbə və ya çəkindirmə strategiyasına yönəldiyini bildirərək "qələbə" konsepsiyasını əsas dəyər kimi ön plana çəkəcəyini də qeyd edib.

ABŞ tərəfindən İsrailə güclənmə yolunda da dəstək təmin olunmaqdadır. Bir müddət əvvəl 4 milyard dollar dəyərindəki hərbi yardımın ən yaxın zamanda göndəriləcəyi ilə bağlı Birləşmiş Ştatların Dövlət katibi Marko Rubio açıqlama verib.

Bir çox siyasi icmalçı isə düşünür ki, ABŞ-nin diplomatik manevrləri və Ukraynaya dəstəyin azalması bir siqnaldır, yəni ABŞ diqqətini Yaxın Şərqə çevirir.

Ukraynada müharibənin tez bitirilməsinə dair planlar, NATO daxilində dəyişən prioritetlər və Pentaqonun İranı əsas təhdid kimi görməsi onu deməyə əsas verir ki, Vaşinqton Təl-Əvivi tək buraxmayacaq. Üstəlik, İranın HƏMAS və “Hizbullah” kimi nəfəslikləri də artıq təsirsiz hala gətirilib.

Müharibə sadəcə silah və əsgərlərdən ibarət deyil, eyni zamanda siyasi iradə və iqtisadi hazırlıq tələb edir. İranın iqtisadiyyatı uzun müddətdir ABŞ sanksiyaları məngənəsindədir.

Vaşinqtonun və İsrailin niyyəti bəllidir – İranın nüvə ambisiyalarını məhv etmək, onun regional təsirini zəiflətmək və mümkün qədər az itki ilə qalib gəlmək. İsrailin Yaxın Şərqdəki nəhəng şahmat taxtasına bənzəyən siyasəti yavaş-yavaş öz bəhrəsini verir. Ancaq baş verə biləcək mümkün silahlı qarşıdurmada kimin qazanclı çıxacağını zaman göstərəcək.