ABŞ rəsmisindən Qarabağla bağlı mühüm açıqlama

ABŞ Dövlət Departamentinin rəsmi nümayəndəsi Metyu Miller növbəti dəfə Azərbaycan və Ermənistan arasındakı münasibətlərdən danışıb.

“Putin problemlə bağlı çoxsaylı açıqlamalar verib. O, hazırda regionda baş verən hər şeydə Paşinyanı günahlandırır. Onun bu məsələdən Ermənistanın hazırkı hakimiyyətini devirmək üçün istifadə etməyə çalışdığına dair fikirlər mövcuddur. Bildiyiniz kimi, “Vaqner” muzdlularının Ermənistanda bu cür fəaliyyətlə məşğul olması ilə bağlı bəzi məlumatlar var”, – deyə jurnalist Millerə sual ünvanlayıb.

Dövlət Departamentinin rəsmi nümayəndəsi sualı belə cavablandırıb: “Sadəcə deyəcəyəm ki, biz işləməyə davam edirik. Mən bu şərhə cavab vermək fikrində deyiləm. Sadəcə onu deyim ki, biz Ermənistanla Azərbaycan arasındakı vəziyyəti həll etmək üçün çalışmağa davam edəcəyik.

Blinken son bir həftədə çoxsaylı danışıqlarla bu işdə şəxsən iştirak edib. Son 24 saat ərzində Ağdam marşrutu ilə Qarabağa humanitar yüklərin bir partiyası keçib və ona görə də biz bu məsələnin vacibliyi ilə bağlı konkret fikrimizi bir daha təkrar edirik: Qısamüddətli məsələ kimi hər iki yolun açılmasını, daha uzunmüddətli məsələ kimi isə iki ölkənin yekun razılığa gəlməsini istəyirik”, – deyə Metyu Miller bildirib.