Aktaudakı təyyarə qəzasının yekun hesabatı nə vaxt açıqlanacaq?

“AZAL-a məxsus təyyarənin Aktau yaxınlığında qəzaya uğraması ilə bağlı araşdırmaya dair yekun hesabat 2025-ci ilin sonuna qədər təqdim ediləcək”.

Bunu Astanada keçirilən mətbuat konfransında Qazaxıstan nəqliyyat nazirinin müavini Talqat Lastayev bildirib.

“Beynəlxalq Mülki Aviasiya Təşkilatının tələbləri, standartları və tövsiyə olunan təcrübəsinə əsasən, araşdırma bir il çəkir. Müvafiq olaraq, cari ilin dekabrına qədər araşdırma üzrə yekun hesabat tamamlanmalıdır”, – deyə T.Lastayev təyyarə qəzasının araşdırılması müddəti ilə bağlı suala cavab verib.

Xatırladaq ki, qəza dekabrın 25-də Qazaxıstanın Aktau şəhəri yaxınlığında baş verib. Təyyarənin göyərtəsində olan 67 nəfərdən 38-i həlak olub, 29 nəfər isə sağ qalıb. İlkin məlumatlara görə, təyyarə Rusiyanın Qroznı şəhəri üzərində hava məkanında baş verən fiziki və texniki xarici müdaxilə nəticəsində qəzaya uğrayıb.