Albaniyanın BMT-dəki nümayəndəsi regiondakı vəziyyətdən danışdı

“Mayın əvvəlində ABŞ-də baş tutan sülh danışıqlarından sonra Azərbaycan-Ermənistan münasibətlərinin normallaşması prosesinin aktivləşməsini alqışlayırıq”.

Bunu Albaniyanın BMT-dəki daimi nümayəndəsi Fərid Hoca BMT Təhlükəsizlik Şurasının iclasında bildirib.

“Azərbaycan və Ermənistan liderləri 1991-ci il tarixli “Alma-Ata Bəyannaməsi”nə sadiqliyini bir daha təsdiqləyiblər. Tərəflərin qonşuların suverenliyi, ərazi bütövlüyünə hörmət etməsi, mübahisələrin dinc yolla həllinə hazırlıqlı olması çox vacibdir. Hər iki tərəfin kompleksli sülh müqaviləsinə nail olmaq üçün uzunmüddətli danışıqlar planına sadiqliyini alqışlayırıq”, – deyə diplomat vurğulayıb.

Diplomat dəmir yolu xəttinin də tez bir zamanda işə düşməsini dəstəklədiklərini və Avropa İttifaqının da bu layihəyə maliyyə dəstəyi verəcəyinə ümid etdiyini bildirib.

O həmçinin Ağdam-Xankəndi yolundan istifadə edilməli olduğunu da diqqətə çatdırıb.

“Humanitar tələbatlar siyasiləşdirilməməli və digər məsələlərin çözümü üçün sui-istifadə olunmamalıdır. Humanitar tələbatlar hər yerdə, həmçinin Qarabağ regionunda təmin olunmalıdır. Fikrimizcə, söhbət humanitar məsələdən gedirsə, mümkün olan hər şeyi, bütün variantları nəzərdən keçirmək lazımdır. Bura digər yollar, həmçinin təklif olunan Xankəndi-Ağdam yolu da daxildir. Bununla da bu əraziyə göndərilən malların daha tez çatdırılması mümkün olacaq”, – deyə o bildirib.

Albaniyalı diplomat delimitasiya prosesi, ərazilərin minadan təmizlənməsinin də vacib olduğunu vurğulayıb.