Alen Simonyan ardıcıl 4 dəfə "Qarabağ" dedi | Qarışmayın və susun!

Ermənistan parlamentinin spikeri Alen Simonyan Azərbaycana qarşı hərbi cinayətlərdə ittiham olunan Qarabağ separatçılarının keçmiş “liderləri”nin yanvarın 17-də Bakıda başlayan məhkəmə prosesini şərh etməkdən çəkinib.

Bu barədə ölkə mətbuatında məlumat verilib. Bildirilib ki, o, jurnalistlərə qısaca cavab verərək “Şərh ediləsi bir şey yoxdur” deyib. Bundan əlavə, A.Simonyan separatçıların tənqidinə reaksiya verməkdən qəti şəkildə imtina edib, onlara “qarışmamağı və susmağı” məsləhət görüb.

Ermənistanlı spiker həmçinin “Artsax deyil, Qarabağ demək daha düzgündür”, – deyə vurğulayıb və jurnalistlərlə söhbəti zamanı ardıcıl dörd dəfə “Qarabağ” sözünü işlədib.

Siyasətçi Ermənistanın heç vaxt bu regionun müstəqilliyini tanımadığını xatırladıb. Ona Ağdamdan təzə narlarla şəkil çəkdirdiyi və “Ağdam mənim vətənimdir” yazdığı xatırladılanda isə A.Simonyan tərəddüdlə “Hamımız səhv edirik”, – deyə cavab verib.

İrəvan və Bakı arasında danışıqların gedişatını şərh edən Alen Simonyan qeyd edib ki, təmaslar müsbət istiqamətdə davam edir. Onun sözlərinə görə, Ermənistan və Azərbaycan arasında sülh müqaviləsinin razılaşdırılmamış iki bəndi üzrə müzakirələr davam etdiriləcək.