Alen Simonyandan Qarabağla bağlı açıqlama

Təkcə Ermənistan parlamentinin sədri Alen Simonyan yox, Baş nazir Nikol Paşinyan və erməni deputatlar da birmənalı olaraq Azərbaycanın ərazi bütövlüyünü tanıdıqlarını, qondarma rejimdən imtina etdiklərini və dolayısı ilə separatizmin normallaşma prosesinə zərbə vurduğunu bildirirlər.

Əslində, həqiqətin ermənilər tərəfindən etiraf edilməsi onların sülh tərəfdarı olduğu görüntüsü yaradır. Lakin Vətən müharibəsindən sonra dəfələrlə bu reallığı dilə gətirib, əməlləri ilə əksini nümayiş etdiriblər.

Bu isə haqlı olaraq sual doğurur ki, Ermənistan siyasi elitası bu mövqeyində, həqiqətən, səmimidir, yoxsa bu, növbəti hiyləgərliyin anonsudur?

Ermənistan rəhbərliyinin ikibaşlı siyasət həyata keçirdiyi, gah sülhdən danışıb, gah da əksinə addım atdığı ilk deyil. Rəsmi İrəvanın zamana və proseslərin gedişinə uyğun olaraq siyasi mövqelərini dəyişdiyinin dəfələrlə şahidi olmuşuq. Ona görə də ermənilər tərəfindən həqiqətin belə etirafı birmənalı qarşılanmır, inamsızlığa səbəb olur.

Azərbaycan ərazi bütövlüyünu bərpa edəndən sonra regionda sülh şəraiti və iqtisadi inkişaf üçün münbit zəmin yaranıb. Ermənistan hakimiyyəti də xalqının maraqlarını qorumaq və inkişafa nail olmaq üçün qonşu xalqlarla münasibətləri normallaşdırmalı, kənar qüvvələrin təxribatlarına uymamalıdır. Bu inkişaf ən çox elə İrəvanın özü üçün lazımdır.