Anna Akopyan Ukraynada qondarma rejimdən danışıb

Ermənistan Baş naziri Nikol Paşinyanın həyat yoldaşı Anna Akopyan “Birinci Xanımlar və Cənablar” sammitində iştirak etmək üçün Kiyevə səfər edib.

A.Akopyanın Ukraynaya getməsi və səfər çərçivəsində qondarma rejim haqqında danışması, buna isə məhz Ukrayna siyasi elitasının şərait yaratması, təəssüf doğurduğu qədər həm də qəbuledilməzdir. Buna görə də bu dəvətin və Azərbaycanın ərazi bütövlüyünə hörmətsizliyi ehtiva edən çıxışın məsuliyyəti ilk növbədə rəsmi Kiyevin üzərinə düşür. Halbuki, Ukrayna özü Azərbaycanın ərazi bütövlüyünü daim dəstəkləyib, Azərbaycan isə Ukraynanın işğalına biganə qalmayaraq bu ölkə üçün ən yüksək səviyyədə dəstəyini nümayiş etdirib.

Qeyd etmək yerinə düşər ki, 2014-cü ildən etibarən Ukrayna da Azərbaycanla oxşar problemdən əziyyət çəkir. Bu ölkənin də daxilində Luqansk və Donetsk adlı qondarma respublikalar yaradılıb, ərazi bütövlüyünə təhdid törədilib. Bəs belə olan halda Azərbaycanda separatizm ocağı yaradan Ermənistan liderinin xanımının qondarma rejimi dəstəkləyən çıxışına şərait yaratmaq nə qədər düzgündür?

Görünür, Ermənistan hərbi-siyasi rəhbərliyi son dövrlər baş verən hadisələrdən başını itirib və siyasi manevrlər etmək qərarına gəlib. Amma Azərbaycanla analoji problemdən əziyyət çəkən ölkəni bu məsələyə alət etmək ən azından gülünc və absurddur. Ukrayna isə müharibə başlayan gündən ona humanitar yardımlar edən, vətəndaşlarına qucaq açan ölkəyə etdiyi xəyanətə görə xəcalət çəkməlidir. Getdikcə dalana dirənən Ermənistana görə Azərbaycanı itirmək Kiyev üçün yaxşı heç nə vəd etmir. ...