"Astara" dövlət sərhədindən buraxılış məntəqəsindən 600-dən çox çinlinin keçməsi təmin olunub

"Çin iki ölkə arasında ənənəvi dostluğun daha da inkişaf etdirilməsi, dövlət başçılarının əldə etdiyi mühüm razılaşmaların qətiyyətlə həyata keçirilməsi və Çin-Azərbaycan hərtərəfli strateji tərəfdaşlıq münasibətlərinin inkişafına yardım göstərilməsi üçün Azərbaycanla əməkdaşlığa hazırdır".

Bunu Çinin Bakıdakı səfiri Lu Mey bu gün keçirilən brifinqdə deyib.

Lu Mey Azərbaycan hökumətinə ölkə vətəndaşlarının İrandan təxliyəsində göstərdiyi köməyə görə minnətdarlığını ifadə edib.

"Xüsusilə vurğulamaq lazımdır ki, ABŞ və İsrailin İrana qarşı əməliyyatının başlanmasından bəri Azərbaycan hökuməti Çin vətəndaşlarının İrandan təxliyəsinə fəal şəkildə kömək edib. Astara sərhəd-keçid məntəqəsi vasitəsilə 600-dən çox Çin vətəndaşının sərhədi uğurla keçməsini təmin edilib. Bu, Çin və Azərbaycan arasındakı yüksək səviyyəli siyasi etimadın növbəti təsdiqidir. Bu baxımdan, göstərilən yardıma və hərtərəfli dəstəyə görə Azərbaycan hökumətinə dərin minnətdarlığımı bildirirəm", – deyə Lu Mey qeyd edib.