Avropa Parlamenti Azərbaycandan nə istəyir? - Sifarişlə işləyənlərin acı sonu

Azərbaycan ard-arda böyük uğurlara imza atdıqca, suverenliyini bərpa edərək Cənubi Qafqazda sülhün və əmin-amanlığın təmin olunmasına nail olduqca bundan narahat olan dairələr ölkəmizə qarşı fəaliyyətlərini daha da gücləndirirlər.

Torpaqlarımız işğaldan azad edildikdən sonra hər addımda Azərbaycana qarşı nifrət püskürən Avropa Parlamenti növbəti dəfə ölkəmizi "qətnamə atəşi"nə tutub.

Bu qurum Azərbaycan əleyhinə olduqca sərt qətnamə qəbul edib. Parlamentdə keçirilən səsvermədə 474 nəfər sənədi dəstəkləyib. 4 nəfər bu ədalətsiz qərarın əleyhinə səs verərkən, 51 deputat bitərəf qalıb.

Təbii ki, bu cür qətnamələrin Azərbaycan üçün heç bir hüquqi qüvvəsi yoxdur. Azərbaycan cəmiyyəti də bunların adi kağız parçası olduğunu, təzyiq metodu olaraq ölkəmizin əleyhinə istifadə edildiyini yaxşı bilir. Erməni lobbisinin təsiri altında olan Avropa Parlamentinin ölkəmizə qarşı düşmənçilik siyasəti Azərbaycanla bu qurum arasında əlaqələrə böyük zərbə vurub.

Bu qurum özünü dünyada "demokratiya və insan hüquqları"nın himayəçisi elan edərək bu sahəni inhisara alıb. Avropa institutlarının təzyiq metodu kimi müstəqil siyasət yürüdən ölkələrə, o cümlədən Azərbaycana qarşı bu cür qərəzli mövqe sərgiləməsi onların ədalət anlayışından nə qədər uzaqda qaldığının nümunəsidir.