Avropa platformasından daha bir riyakarlıq

Avropa Şurası Parlament Assambleyası yay sessiyasının gündəliyinə təcili müzakirə üçün “Laçın yolu vasitəsilə sərbəst və təhlükəsiz girişin təmin olunması” məsələsi daxil edilib.

Assambleyanın bu cür qızışdırıcı bəyanat yayması hər şeydən əvvəl Azərbaycanın daxili işinə qarışmaq, digər tərəfdən isə separatçıları növbəti təxribata sürükləmək mahiyyəti daşıyır. Təşkilatın belə bir açıqlama ilə çıxış etməsi həm də Qərb institutları vasitəsilə sülh gündəliyi çərçivəsində keçirilən üçtərəfli görüşləri heçə saymaq anlamına gəlir.

Qərb təşkilatları ermənilərə sülh və sabitlik naminə separatçı meyillərdən əl çəkmək üçün təzyiq etmək əvəzinə, Azərbaycanın legitim hüquqlarına kölgə salır. Bölgədə sülhə təhdid yaradan, iqtisadi mexanizmlərin inkişafına əngəl törədən Ermənistan olduğu halda, Avropa Şurasının Parlament Assambleyası anti-Azərbaycan mövqeyi sərgiləyir və bununla da qərəz yuvasına çevrildiyini bir daha göstərir.

Aydındır ki, Avropa Şurası Parlament Assambleyasının mövqeyi neçə illərdir ölkəmizə qarşı yürüdülən ikili standartlar tendensiyasının davamıdır. Əks halda, 30 il Ermənistanın cinayətlərinə susan, heç bir tutarlı tədbir görməyən təşkilat nə üçün məhz indi tələsməyə başlayıb?