Azərbaycan-ABŞ münasibətlərində yeni dövr | Trampın qərəzli siyasəti dəyişəcək?

ABŞ-də Azərbaycana yanaşma baxımından heç də müsbət qərarları ilə yadda qalmayan Bayden-Blinken administrasiyası tarixə qovuşub.

Cənubi Qafqazda öz maraqlarını diktə etmək istəyən Cozef Bayden sağ əli Entoni Blinkenin təkidi, erməni lobbisinin təzyiqi ilə regionda bütün qərarları məhz Ermənistanın lehinə verirdi.

Hətta bu cütlük hakimiyyətlərinin son günlərində yanğından mal qaçırarcasına haylarla müttəfiqlik xartiyası imzalamağa da imkan tapıb. Lakin bu sənəd hüquqi baxımdan elə də əhəmiyyət daşımır. Onun nə dərəcədə həyata keçiriləcəyi də sual altındadır. Çünki indi ABŞ-də yeni səhifə açılır.

Azərbaycan Prezidenti və xalqının Donald Trampın 2-ci hakimiyyəti dövründə, yəni qarşıdakı 4 ildə ölkəmizə qarşı münasibətin müsbət mənada dəyişəcəyinə ümidi böyükdür. Təsadüfi deyil ki, iki ölkə arasında diplomatik münasibətlərin ən pik həddi də D.Trampın ilk prezidentliyi illərinə təsadüf edir.

Politoloq Şəbnəm Həsənovanın sözlərinə görə, Azərbaycan ABŞ ilə münasibətlərin müsbət inkişafında maraqlıdır:

“Prezident İlham Əliyev Donald Trampa təbrik məktubu ünvanladı. Məktubun kontenti onu deməyə əsas verir ki, pozitiv ruhdadır. Konstruktiv siqnallar, açar sözlər istifadə olunub. Zənnimcə, ABŞ-Azərbaycan münasibətlərinin inkişafı üçün əsaslı bir baza mövcuddur”.